My Joomla

இடைநிலைப் பள்ளிகளில் தமிழ் - உஷா மனோஹரன் PDF அச்சிடுக மின்-அஞ்சல்


மலேசிய இடைநிலைப் பள்ளிகளில் தமிழ் இலக்கியப் பாடம் - ஒரு பார்வை

மு. உஷா மனோஹரன் B.A


முன்னுரை

1.0          இலக்கியம் - சிறு விளக்கம்.

இலக்கு என்ற சொல்லில் இருந்தோ இலட்சியம் என்ற சொல்லில் இருந்தோதான் இலக்கியம் என்ற சொல் பிறந்ததாகக் சான்றோர்கள் கருத்துரைத்துள்ளனர். இலக்கியம் என்றசொல் பண்டைக் காலத்தில் ஒரு பொதுச் சொல்லாக வழங்கிற்று. பிழையில்லாமல், இலக்கண வழுவில்லாமல் எழுதப்படுவன எல்லாம் இலக்கியம் என்பது இலக்கண நூலார் கொள்கை.

தமிழ் இலக்கியம் என்பது இரண்டாயிரம் ஆண்டுகளுக்கு மேலான தொடர்ச்சி கொண்ட உலகின் சிறந்த இலக்கியங்களில் ஒன்று.வாழ்வின் பல்வேறு கூறுகளைத் தமிழ்இலக்கியங்கள் இயம்புகின்றன.  தமிழ் இலக்கியம் நீண்ட பரப்புடையது.ஒவ்வொரு காலக் கட்டத்திலும் அந்தந்த காலத்தினுடைய சமூகக் குரலாக இலக்கிய படைப்பு அமந்துள்ளதை நாம்அறியலாம். இலக்கியப் படைப்புக்கள் மக்களது உள்ளத்து உணர்ச்சிகளைப் பிரதிபலித்துக் காட்டக்கூடியக் கண்ணாடி-யாகும்.  மக்களின் வாழ்வியல் மரபுகளை இனங்கண்டுஅறிந்துணர்துவது இலக்கியங்களின் பண்பாகும்.

1.1          மலேசியத் தமிழ் இலக்கியம்.

தமிழ் இலக்கியத்தின் அகவை ஏறக்குறைய 140 ஆண்டுகள் எனலாம்.மலேசியத் தமிழ் இலக்கியம்,தமிழகம் மற்றும் இலங்கை என்னும் ஆலமரத்தின் ஒரு விழுதாகவே இங்கு அதுவேர்விடத் தொடங்கிற்று.முதலில்,பத்தொன்பதாம் நூற்றாண்டின் பிற்பகுதியில் கவிதை இலக்கியம் தோன்றி வளரத் தொடங்கியது. அதற்குப் பின்னர் இருபதாம் நூற்றாண்டின்தொடக்கத்தில் உரைநடையில் நாவலும் சிறுகதையும் தோன்றி வளரத் தொடங்கியது. தொடக்கக் காலத்தில்,மலேசியத் தமிழ் இலக்கியப் படைப்புக்களில் மலேசிய இந்தியச் சமுதாயத்தின் வாழ்வியல் கூறுகள் மிகக் குறைவாகவே பதிவு செய்யப்பட்டுள்ளன. இரண்டாம் உலகப் போருக்குப் பின்னர் மலேசியத் தமிழ் இலக்கியத்தில்,மலேசிய மண்வாசனையைச் சுமந்த படைப்பிலக்கியங்கள் பரவலாக வெளிவரத் தொடங்கின.

1.2          மலேசியத் தமிழ்க் கல்வியில் தமிழ் இலக்கியம்.

மலேசியத் திருநாட்டில் தமிழ்மொழிக் கல்வியானது ஆறு ஆண்டுகள் தமிழ்த் தொடக்கப் பள்ளிகளில் கற்பிக்கப்படுகின்றது. அதற்குப் பின்னர், ஐந்து ஆண்டுகள் இடைநிலைப்பள்ளிகளில் தமிழ்மொழி ஒரு கூடுதல் மொழிப்பாடமாகப் பயிற்றுவிக்கப்படுகின்றது. தொடக்கப்பள்ளிகளில் தொடங்கி இடைநிலைப் பள்ளிகள் வரை தமிழ்மொழிப் பாடத்தின் ஊடேயும் இலக்கியக் கூறுகள் இணைக்கப்பட்டுக் கற்பிக்கப்படுகின்றன. தமிழ்மொழிப் பாட நூல்களிலும் இலக்கியம் தொடர்பான கதைகள்,  நாடகம், வாசிப்புப் பனுவல்கள் போன்றவை மாணவர்களுக்கு அறிமுகப்படுத்தப்படுகிறது.

1.3          மலேசிய இடைநிலைப் பள்ளிகளில் தமிழ் இலக்கியம்.

மலேசிய இடைநிலைப் பள்ளிகளில் புகுமுக வகுப்பு ( remove  ) தொடங்கி ஐந்தாம் படிவம் வரை தமிழ்மொழிப் பாடம் விருப்பப் பாடமாகவும் தேர்வுப் பாடமாகவும் அமைகிறது. மலேசியாவில் ஏறக்குறைய 500 இடைநிலைப் பள்ளிகளில் தமிழ்மொழி ஒரு பாடமாகக் கற்பிக்கப்பட்டு வருகின்றது.1979 இல் கல்வித்திட்ட மேம்பாட்டு மையம் இடைநிலைப்பள்ளிகளுக்காக உருவாக்கிய தமிழ்மொழிப் பாடத்திட்டத்தை அடிப்படையாகக் கொண்டே இப்பாடம் போதிக்கப்படுகின்றது. இப்பாடத்திட்டம் பிறரிடைத் தொடர்புத்துறை,தகவல்துறை, இலக்கியத் துறை ஆகிய மூன்று முக்கியத் துறைகளைக் கொண்டிருக்கிறது.

 

1.3.1      மலேசிய இடைநிலைப் பள்ளித் தமிழ்மொழிப் பாடத்திட்டதில் தமிழ் இலக்கியம்

புகுமுக வகுப்பு தொடங்கி ஐந்தாம் படிவம் வரை, மாணவர்களுக்குத் தமிழ்மொழிப் பாடத்தின் ஊடே பல்வகைச் செய்யுள்கள், பல்வகை மொழியணிகள் போன்ற இலக்கியக் கூறுகள்கற்பிக்கப்படுகின்றன.

 
 

1.3.2 மலேசிய இடைநிலைப் பள்ளிகளில் தமிழ்மொழிப் பாடநூல்களில் இலக்கியம்.

புகுமுக வகுப்பு 1.வள்ளல் சீதக்காதி 2.மன்னர் குவலயன் 1.தேவேந்திரன் கட்டிய வீடு 2.பெரும்புலவர் மோசி கீரனார் 3.மந்திரச்சவுக்கு (மங்கோலிய இலக்கியம்)            

படிவம் ஒன்று 1.விகடகவி 2.கண்ணபிரான் ( பணிவும் பரிசும் ) 3.யோகமுனியும் விதுரனும் 4.ஹங் ஜெபாட் (மலேசிய மலாய் இலக்கியம்)

படிவம் இரண்டு 1.பொற்காசுப் பேழை (மன்னர் சாலமன்)  2.சபரியும் மாதஸ்க முனிவரும் 3.மசூரி (மலேசிய மலாய் இலக்கியம்) 4.தத்துவ ஞானி சாக்ரடீஸ் (அயலக இலக்கியம்)                1.தன்னிகரற்ற கவிஞர் கம்பர் _

படிவம் மூன்று 1.மகாபாரதம் - நாடு வேண்டாம் கண்ணா 2.ஸ்ரீ ஜயேந்திரனின் நீதிக்கதைகள் 3.துரியோதனன் 4.இளங்கோவடிகள் 5.கர்ணன் ( தாயும் சேயும் ) 6.தசரதர் செய்த சபதம்7.தெனாலிராமன் கதைகள் (பால் குடிக்காத பூனை) 8.வீரபாண்டிய கட்டபொம்மன் 9.பாஞ்சாலியின் துயரம் (அறிவுடையோர் பெரியோர்) 10.தமிழ்ப்பண்பாடு (பாஞ்சாலி கண்ணகி,மங்கையர்கரசி) 11. பார்த்திபன் கனவு (அவனுக்கு அது போதும்) 12.ஒகினாவின் கதைகள் (அயலக இலக்கியம்) 13.லியோ டால்ஸ்டாய் (அயலக இலக்கியம்)  1.சித்தார்த்தன் துறவு அம்மா மரகதம்மாள்

படிவம் நான்கு 1.கற்பின் கனலி கண்ணகி 2.தூது சென்ற கண்ணன் 3.கமலாம்பாள் சரித்திரம் 4.தமயந்தியின் சுயம்வரம் 5.அமைச்சர் ஆடலரசு 6.ஹங் துவா(மலேசிய மலாய் இலக்கியம்) 7.குறளோவியம் ( கலைஞர் கருணாநிதி )      1.வினோதரச மஞ்சரி 2.இந்த மேடையில் சில நாடகங்கள் 1.பங்கு (அரை நூற்றாண்டு சிறுகதைகள்) நா.ஆ. செங்குட்டுவன்

படிவம் ஐந்து 1.இராமனின் ஆற்றாமை 2.காப்பியப் புலவர் கம்பர் 3.கொற்றவ சரண் 4.மணிமேகலையின் மாண்பு 5.அர்ச்சுனனே சிறந்தவன் 6.நளவெண்பா

 

1.3.2.1 மலேசிய இடைநிலைப் பள்ளிகளில் தமிழ்மொழிப் பாடநூல்களில் கவிதை இலக்கியம்

படிவம் கவிதைகள்

புகுமுக வகுப்பு 1.மலரும் மாலையும் (தேசிய விநாயகம் பிள்ளை)  -கூண்டுக்கிளி -பசுவும் கன்றும் -இயற்கை -நெற்பானையும் எலியும் 2.பாப்பாப் பாட்டு - பாரதியார் 3.கைத்தொழில் -இராமலிங்கம் பிள்ளை 4.மகிழம் பூ (சோமசன்மா)   -பொங்கல் -அன்னை 5.அச்சமில்லை அச்சமில்லை - பாரதியார் 6.தமிழின் இனிமை - பாரதிதாசன் 7.குழந்தைச் செல்வம் (தேசியவிநாயகம் பிள்ளை)   -உழைக்க வேண்டும் -கடல் 9.குட்டிக் குரங்கு - கு.காளிமுத்து 10.பினாங்குத் தீவு (முதல் மலர்) -கரு.திருவரசு

படிவம் ஒன்று 1.உற்று நோக்குக!கற்று மகிழ்க!  இ- ஞானப் பிரகாசச் செல்வன் 2.உடல் நலம் பேணல் (மலரும் மாலையும்) - தேசிய விநாயகம் பிள்ளை 3.காற்று (பள்ளிப் பறவைகள்) -பெருஞ்சித்திரனார் 4.மழையே ஓடி வா! (தமிழ்ச்சிட்டு) - துரை மாணிக்கம் 5.குழந்தைகான் (இசை அமுது) - பாரதிதாசன் 6.சிறந்திடு - மணியன் 7.உயர்வோம் (மலரும் மாலையும்) - தேசியவிநாயகம் பிள்ளை 8.வெள்ளித்துளிகள் (வண்ணங்கள்) - கரு.திருவரசு 9.தைப்பொங்கல் (மலரும் மொட்டுகள்) - இளம்பாரி 10.உறுதி!உறுதி!உறுதி! (சிரிக்கும் பூக்கள்) - அழ.வள்ளியப்பா

படிவம் இரண்டு 1.மழைக் குருவி (பெய்யெனப் பெய்யும் மழை ) - வைரமுத்து 2.நாம் உயர்தினை - ஞானதேசிகன் 3.நூலைப் படி (ஒரு தாயின் உள்ளம் மகிழ்கிறது) - பாரதிதாசன் 4.கோதறுகல்வி (ராமனுஜ காவியம்) - வாலி 5.ஒன்றே கடவுள்! - சி.வேலுசாமி 6.எதிர்ச்சொல் - சோமசன்மா

படிவம் மூன்று 1.பாரதியார் கவிதைகள் -தொழில் -காணி நிலம் வேண்டும் -பகைவனுக்கு அருள்வாய் 2.புதுவெள்ளம் - காசிதாசன் 3.ஒரு வானம் ஒரு சிறகு (கொடிகள் ) -  மு.மேத்தா4.பொய்க்கால் குதிரை (வாழ்க்கை) - கவிஞர் வாலி 5.மறுபடியும் வேண்டும் - சீனி நைனா முகம்மது 6.தமிழ் - பாரதிதாசன் கவிதைகள் 7.மனிதச்சுவடு - சிங்கை முகிலன் 8.மாணவனுக்கு -நாமக்கல் கவிஞர் 9.எழல் வேண்டும் ( மருக்கொழுந்து) - தமிழ்மணி எல்லோன் 10.புதிய ஞாயிறு ( இதயமலர்கள்) - க.து.மு.இக்பால்

படிவம் நான்கு 1.உறுதி வேண்டும் - பாரதியார் கவிதைகள் 2.வெள்ளி நிலவு (அறிவியலின் பெருமை) - வீரமான் 3.யார் நம்மைத் தூற்றுவது (திருப்பு முனைகள்) - ஐ.உலகநாதன்4.மென்காற்றும் வன்காற்றும் (மானிட சக்தி) - பாரதிதாசன் கவிதைகள் 5.மலர்ந்தது காலை -  அதிகை மணி 6.எங்கள் மன்னவன்(பூச்சரம்) - காரைக்கிழார் 7.புதிய சமுதாயம் -  இராமலிங்கம்பிள்ளை 8.தாய் தராத அன்பு சேய் தருமா பின்பு? - தீ.சி.பொன்னுசாமி 9.தயதரன் வரம் (கம்பனுக்குப் பாட்டோலை) - இரா.திருமுருகன் 10.தேனருவி -  பொன்முடி

 

படிவம் ஐந்து 1.அழகு (முத்துப்பேழை) - சோலை முருகன் 2.அன்னை மலேசியகம் வாழ்க ( தேன்துளி) - கவிஞர் மாலவன் 3.அசலும் நகலும்(சிறகுகள்) - பெ.திருவேங்கடம்4.உண்மை(திருப்புமுனைகள்) - ஐ.உலகநாதன் 5.தமிழன் இதயம் - இராமலிங்கம் பிள்ளை 6.தேருரைச் சிலம்பன் - வீரமான் 7.இதயம் கேட்கிறது (தென்றல் கவிதைகள்) - தலைஞாயிறுஅலாவுதின் 8.ஒப்பனை மனிதர்கள்(பூமிக்குப் புதிய திசை) - மலர்மகன் 9.பணமெனும் நங்காய் (எண்ணச் சிறகுகள்) - Dr.சவகர்லால் 10.நன்றி மறவாமை (நல்ல முடிவு) - சிங்கை முகிலன்11.புரிந்து கொண்டால் -  க.து.மு.இக்பால் 12.நல்ல மாணவன்(ஏக்கங்களின் தாக்கங்கள்) - கா.வேழவேந்தன் 13.மாணவர்க்கு - நாச்சிகுளத்தார்

 மலேசிய இடைநிலைப் பள்ளிகளில்,அரசாங்கம் நடத்தும் 3ஆம் படிவதிற்கான கீழ் இடைநிலை மதீப்பீட்டுச் சான்றிதழ் (PMR) மற்றும் 5ஆம் படிவத்திற்கான் மலேசியக் கல்விச்சான்றிதழ் (SPM)தேர்வுகளில், தமிழ்மொழித் தேர்வுத் தாளில் படைப்பிலக்கியம் என்ற பகுதி இணைக்கப்பட்டிருக்கும். இப்பகுதியில், மலேசியா மற்றும் அயலக சிறுகதைகள் (சிலமாற்றங்களுடன்) இடம்பெற்றிருக்கும். சிறுகதையின் கருப்பொருள் பாத்திரப் படைப்பு, உணர்ச்சி வெளிப்பாடு போன்ற அடிப்படையில் தேர்வுக்கான கேள்விகள் அமையப்பெற்றிருக்கும்.

 

அதுபோன்றே, இத்தேர்வுகளில் கவிதைகளும் இடம்பெற்றிருக்கும். கவிதைகளில், பாடுபொருள், மையக்கரு, கவிதை உரைநடை போன்ற அடிப்படையில் தேர்வுக்கான கேள்விகள்அமையப்பெற்றிருக்கும். தேர்வு நோக்கமட்டுமல்லாது, மாணவர்கள் கவிதை இலக்கியத்தின் இன்பத்தைச் சுவைக்க வேண்டும் என்ற நோக்கத்திலே பள்ளிப் பாடநூல்களில் பரவலாகப் பலகவிதைகள் இணைக்கப்பட்டுள்ளன. தமிழ்மொழிப் பாடத்தின் ஊடே இலக்கியத்தையும் இழையோடவிடவேண்டும் என்பதே இப்பாடதிட்டதின் முகான்மையான நோக்கமாகும்.

 

 

1.3.3 மலேசிய இடைநிலைப் பள்ளிகளில் படிவம் 4 மற்றும் 5 இல் தமிழ் இலக்கியப் பாடம்.

படிவம் 4 மற்றும் 5 இல் பயிலும் மாணவர்கள் தமிழ்மொழி தவிர, தமிழ் இலக்கியத்தையும் விருப்பப் பாடமாகவும் / அரசாங்கத் தேர்வுப் பாடமாகவும் எடுக்கலாம். இப்பாடத்திற்கானபாடத்திட்டதையும் நூல்களையும் மலேசியத் தேர்வு வாரியமே நிருணயிக்கிறது. ஒரு சில பள்ளிகளைத் தவிர, பெரும்பாலான இடைநிலைப் பள்ளிகளில் தமிழ் இலக்கியப் பாடத்தைக்கற்பிக்க பள்ளி அட்டவணையில் நேர ஒதுக்கீடு இல்லை. இதன் காரணத்தால் பெரும்பாலான இடைநிலைப் பள்ளிகளில் தமிழ் இலக்கியம் கற்பிக்கப்படுவதில்லை. தமிழ்ப்பற்று மிக்கஆசிரியர் சிலர், பாடவேளைக்கப்பால் தன்னார்வ அடிப்படையில் மொழி உணர்வோடும் இன உணர்வோடும் தன்னலம் கருதாமல் இவ்விலக்கியப் பாடத்தைக் கற்பிக்கின்றனர்.

 

இவ்விலக்கியப் பாடத்தில் கவிதை, நாவல், நாடகம் போன்ற நவீன இலக்கியங்கள் மாணவர்களுக்குக் கற்பிக்கப்படும். மலேசியாவில், இவ்விலக்கியப் பாடமானது “சீனியர்கேம்ப்ரிஜ்” எனப்படும் காலந்தொட்டே, ஏறத்தாழ 50 ஆண்டுகள் வரலாற்றினைக் கொண்டதாகும்.

அந்த வகையில், கடந்த 1960ஆண்டு தொடங்கி, தற்போதைய காலக்கட்டம் வரை தமிழ் இலக்கியப் பாடத்திட்டத்தில் இடம்பெற்ற தமிழ் இலக்கிய நூல்களின் பட்டியல் மற்றும் தமிழ்இலக்கியப் பாடத்தைத் தேர்வு செய்த மாணவர்களின் எண்ணிக்கை உள்ளடக்கிய அட்டவணையைக் காண்போம்.

எஸ்.பி.எம் தேர்வுக்கான தமிழ் இலக்கிய நூல்கள்.

1960 - 1967          கடற்கரையினிலே (கட்டுரை தொகுப்பு)  இரா.பி.சேதுபிள்ளை சின்னாதேவி தமிழ் மாலை (தொகுப்பு)

1968 - 1972          அகல் விளக்கு (மு.வ)       -              -

1973 - 1976          கள்ளோ காவியமோ (மு.வ )             இளங்கோவடிகள் பாரதியார்/பாரதிதாசன் கவிதைகள்

1977 - 1980          சினேகிதி (அகிலன்)      காதல் எங்கே மலரும் மாலையும் (தேசிய விநாயகம் பிள்ளை )

1981 - 1985          கரித்துண்டு (மு.வ)  வழுவிலா மணிவாசகர் (ப.மு.பரமசிவாநந்தம்)       1. வண்ணங்கள் (கரு.திருவரசு) 2. சந்தன கிண்ணம் ( ஐ.இளவழகு )

1986 - 1990          நெஞ்சின் அலைகள் (அகிலன்)           குமண வள்ளல் (புலவர் அரசு )             -

1991 - 1995          வாடா மலர் ( மு.வ )           நாடகச் செல்வம் (Dr.ஆறு.அழகப்பன்)                    மலரும் மாலையும் (தேசிய விநாயகம் பிள்ளை )

1996 - 2006          குறிஞ்சிமலர் (நா.பார்த்தசாரதி) கர்ணன் - மகாபாரதம் கவிதைப்பித்தன் கவிதைகள்

2007 - 2012          பொன்விலங்கு (நா.பார்த்தசாரதி)     காவிய நாயகி ( இரா.பழனிசாமி )                கவிதைப் பூங்கொத்து (சீனி நைனா முகமது)

2012 - 2015          இலட்சியப் பயணம் ( ஐ.இளவழகு)             (மலேசியா)        மலேசியத் தமிழ்க் கவிதைக் களஞ்சியம் (முரசு நெடுமாறன்)  சிலப்பதிகாரம் நாடகக் காப்பியம் (கலைஞர் மு.கருணாநிதி)

 

1.3.4 மலேசியாவில் எஸ்.பி.எம். தேர்வில் தமிழ் இலக்கியத்தைத் தேர்வுப் பாடமாக எடுத்த மாணவர்களின் எண்ணிக்கை. ( 1998 - 2011 )

வருடம் [மாணவர் எண்ணிக்கை ]

1998  - 340,

 1999         350,

 2000         801

2001         914

2002       1465

2003       2207

2004       3236

2005       3552

2006       3672

2007       4257

2008       3567

2009       3340

2010       2960

2011       2580

 

 

1.3.5  2013 இல் மலேசியக் கல்விச் சான்றிதழ் ( SPM ) தேர்வுக்கு மலேசிய நாவல் தேர்வு.

மேற்கண்ட அட்டவணையை ஆழ்ந்து நோக்குங்கால், 1960 தொடங்கி 2012 வரை 5ஆம் படிவதிற்கான மலேசியக் கல்விச் சான்றிதழ் தமிழ் இலக்கியப் பாடத்திட்டதில் தமிழகநாவல்களே நடப்பில் இருந்து வந்துள்ளன. மலேசிய மண்ணின் மணம் கமழும் இலக்கியங்களையும் மாணவர்கள் நுகர வேண்டும் என்ற எண்ணம் ஒரு தலைமுறையாக மக்களிடையேபரவலாக எழுந்தது.  மேலும், மலேசிய மண்ணின் இலக்கியப் படைபாளிகளுக்கு அங்கீகாரம் வழங்கி அவர்களை ஓங்கச் செய்ய வேண்டும் என்பதும் இதன் உன்னத நோக்கமாகும்.

அந்த வகையில், 2012 ஆம் ஆண்டு முதல், நான்காம் படிவ மாணவர்களுக்கு மலேசிய திருநாட்டின் நாவல் அறிமுகப் படுத்தப்பட்டுள்ளது. 2013 ஆம் நடைபெறும் எஸ்.பி.எம்தேர்வுக்கு இது அமல்படுத்தவிருக்கிறது.எஸ்.பி.எம் தமிழ் இலக்கியப் பாட வரலாற்றில் ஒரு திருப்பு முனையாக, முதல் முறையாக மலேசியத் தமிழ் நாவல் மலர்ந்துள்ளது.1972இல்உருவாகி 1975இல் மலேசியத் தமிழ் எழுத்தாளர் சங்கமும் தேசியத் தோட்டத் தொழிலாளர் சங்கமும் இணைந்து நடத்திய நாவல் போட்டியில் முதல் பரிசு என்னும் மகுடம் சூட்டப்பட்ட,கவிஞர் ஐ.இளவழகு எழுதிய இலட்சியப் பயணம் என்ற நாவல் எஸ்.பி.எம் தேர்வுக்கு எடுத்துக்கொள்ளப்பட்டது.இனி வரும் காலங்களில் இன்னும் பல மலேசிய வரவுகள் எஸ்.பி.எம்தேர்வுக்குத் தெரிவு செய்யப்படலாம்.

1.3.6      மலேசிய இடைநிலைப் பள்ளிகளில் ஆறாம் படிவத்தில் இலக்கியப் பாடம்.

படிவம் ஆறில் பயிலும் மாணவர்கள், மலேசிய உயர்கல்விச் சான்றிதழ் தேர்வுக்கு ( STPM ) தமிழை அரசாங்க தேர்வு பாடமாக எடுப்பத்தற்கு அனுமதிக்கப் படுகின்றனர். மலேசியத்தேர்வு வாரியம் (MAJLIS PEPERIKSAAN MALAYSIA) இப்படத்திற்கான கலைத்திட்டத்தை உறுதிசெய்கிறது.பள்ளிகளில் இப்பாடம் கற்பிக்கப்படுவதில்லை. மாணவர்கள் தங்கள் சொந்தமுயற்சியிலேயே இப்பாடத்தைப் பயில்கின்றனர். தன்னார்வ அடிப்படையில் ஆசிரியர்கள் இப்பாடத்தைக் கற்பிக்கின்றனர்.படிவம் ஆறில் தமிழ் இலக்கியப் பாடம் தனித்து நிற்காமல்தமிழ்மொழி பாடத்தோடு இணைத்துக் கற்பிக்கப்படுகிறது.  கவிதை, நாவல், சிறுகதை போனற நவீன இலக்கியங்களும், பக்தி இலக்கியங்களும் இதன் பாடத்திட்டத்தில் உள்ளடக்கியதாகும்

கடந்த1970ஆம் ஆண்டு முதல் படிவம் 6 க்கான இலக்கிய நூல்களின் பட்டியல் பின்வருமாறு.

காலக் கட்டம் இலக்கிய நூல்கள்

1970 -1980 கள் உலகப்பேரேடு, வஞ்சமகள், ஞானரதம், குயில் பாட்டு, சிலப்பதிகாரம், குறுந்தொகை

1980 -1990 கள் பால்மரக் காட்டினிலே, சமுதாய வீதி

1990 - 2012          அல்லி, குயில் பாட்டு, தமிழ்க்கோவை


1.4          மலேசியாவில் தமிழ் இலக்கியப் பாடம் எதிர்நோக்கும் சிக்கல்கள் / சவால்கள்

மலேசியாவில் தமிழ் இலக்கியப் பாடமானது ஏறத்தாழ 50 ஆண்டுகள் வரலாற்றினைக் கொண்டதாகும். ஆயினும், இவ்விலக்கியப் பாடம் கடந்து வந்த பாதையைச் சற்றுத் திரும்பிப்பார்த்தோமென்றால், இவ்விலக்கியப் பாடம் எதிர்நோக்கிய / எதிர்நோக்கும் பல சிக்கல்களும் சாவால்களும் நம் கண் முன்னே நிழலாடத்தான் செய்கிறது.

ஃ வெள்ளையர் ஆட்சி காலந்தொட்டு, அன்றைய சீனியர் கேம்பிரிட்ஜ், எம்.சி.இ. ( M.C.E ) தேர்வுகளிலும் தமிழ் இலக்கியப் பாடம் ஓர் அனாதைப் பிள்ளையாகவே இருந்து வந்துள்ளது.

ஃ இலக்கியப் பாடத்திற்குத் தேசிய அளவில் கற்றல் கற்பித்தல் வழிகாட்டி கிடையாது. எஸ்.பி.எம். தேர்வில் இலக்கியப் பாடம் கட்டாயப் பாடமாக்கப்படவில்லை.

ஃ ஆரம்ப காலங்களில் இலக்கியப் பாடத் தேர்வுக்கான இலக்கிய நூல்களை மாணவர்கள் சொந்தமாகத் தேடி வாங்க வேண்டிய சூழ்நிலை. இதன் காரணமாகவே பல மாணவர்கள்இலக்கியப் பாடத்தைத் தவிர்த்து வந்தனர்.

ஃ அந்தக் காலத்தில் ஏழாம் வகுப்பு படித்து, ஆசிரியர் பயிற்சி பெற்றிருந்த தமிழ்த் தாகம் கொண்ட தமிழ் ஆசிரியர் பெருமக்களே, இலக்கியப் பாடம் பட்டுப் போகாமல் மலரச் செய்துமணம் பரப்ப வழிவகுத்துச் சென்றுள்ளனர்.

ஃ அன்று தொடங்கிய இலக்கிய ஆசிரியர் பிரச்சனை இன்றளவும் தொடர்கிறது என்றுதான் கூறவேண்டும். பெரும்பாலான இடைநிலைப் பள்ளிகளில் போதிய இலக்கிய ஆசிரியர்கள்இல்லாத சூழ்நிலை நிலவிவருகின்றது. மேலும், தமிழ் இலக்கியப் பாடம் பள்ளி கால அட்டவணையில் கற்பிக்கப்படுவதில்லை.

ஃ தமிழ் இலக்கியப் பாடத்தை எஸ்.பி.எம் தேர்வில் எழுத மட்டும் அனுமதி அளித்துவிட்டு, சுயமாகப் படித்துத் தேர்விற்குத் தயாராக வேண்டியது மாணவர்களின் கடமை என்றுகைக்கழுவி விட்டது கல்வி அமைச்சு.

ஃ எஸ்.பி.எம். தேர்வில், மாணவர்களுக்குக் கட்டாயப் பாடங்கள், துறைசார் பாடங்கள், விருப்பப் பாடங்கள் என கல்வி அமைச்சால் நிர்ணயம் செய்யப்பட்டுள்ளது.மாணவர்கள் உலகசவால்களை ஏற்க மூல பாடங்களையும் துறைசார் பாடங்களையும் தேர்வுக்காகக் கற்கும் வேளையில், தன்னுள் நிகழ்கின்ற அகப்போராட்டத்திற்குப் பலியாவது இலக்கியப் பாடமே.

ஃ தேர்வுக்கு எடுக்கும் பாடங்களின் எண்ணிக்கை கட்டுப்படுத்தப்படும் போது மாணவர்கள் தவிர்க்கத் தூண்டப்படும் பாடம் இலக்கியப் பாடமாகத்தான் இருக்கும் நிலை.

ஃ எஸ்.பி.எம். இலக்கியத் தேர்வுக்குத் தமிழ், தமிழ் இலக்கியப் பாடங்கள் எடுப்பதற்கு இடைநிலைப்பள்ளி முதல்வர்கள் புதுப் புது வியாக்கியானங்களைக் கூறி மாணவர்களைக் குழப்பிவருகின்றனர்.

ஃ இதுபோன்ற சிக்கல்களால் தான் என்னவோ, தொண்ணூறாம் ஆண்டு தொடக்கத்தில் இலக்கியப் பாடத்தைத் தேர்வுக்கு எடுக்கும் மாணவர்களின் எண்ணிக்கை சரியத் தொடங்கியது.

ஃ 2009 ஆம் ஆண்டு அக்டோபர் மாதம் 14 ஆம் திகதி கல்வியமைச்சு வெளியிட்ட சுற்றறிக்கையின்படி எஸ்.பி.எம். தேர்வு எழுதும் மாணவர்கள் 10 பாடங்கள் மட்டுமே எடுக்க முடியும்என கட்டுப்பாடு விதிக்கப்பட்டது. இதனைத் தொடர்ந்து, தமிழ் மொழியும் தமிழ் இலக்கியமும் தேர்விலிருந்து விடுபடும் சூழ்நிலை ஏற்பட்டது.

ஃ பன்னிரண்டு பாடங்கள் எடுக்கலாம் ஆனால் பத்து பாடங்கள் மட்டுமே தேர்வுச் சான்றிதழில் அச்சிடப்படும் எனும் அறிவிப்பு மீண்டும் மாணவர்களைக் கலக்கம் அடையச் செய்தது.

ஃ மாணவர்களின் மனப்போக்கு - எதிர்கால வாழ்க்கைத் தேவைக்குக் குறிப்பாக பொருளாதார அந்தஸ்து மற்றும் வேலை வாய்ப்புகளுக்குத் தமிழ் இலக்கியப் பாடம் அவசியமானஒன்றல்ல என்ற மாணவர்களின் குறுகியச் சிந்தனை.

ஃ பெற்றோரின் மனப்போக்கு -  தமிழ் மொழியையும் தமிழ் இலக்கியத்தையும் படித்தால் சமுதாயதில் உன்னத நிலையில் அந்தஸ்தோடு திகழ முடியாது என்ற பிற்போக்குச் சிந்தனை.

1.4.1      எஸ்.பி.எம் 12 பாட விவகாரம் குறித்து குரல் கொடுத்த பத்திரிகைச் செய்திகள்.

ஃ தமிழ், தமிழ் இலக்கியப் பாட மதிப்பெண்கள் தேர்வு முடிவில் சேர்க்க வேண்டும். அரசுக்கு கோரிக்கை.               (மலேசிய நண்பன் 6.12.2009 )

ஃ எஸ்.பி.எம். தேர்வில் 12 பாடங்கள் - சமூகத் தலைவர்கள் கோரிக்கை.

( மக்கள் ஓசை 13.12.2009 )

ஃ எஸ்.பி.எம். தமிழ் மொழி இலக்கியப் பாடங்கள் விவகாரம் - பெற்றோர் மறியலில் குதிப்பர்.

( மக்கள் ஓசை 14.12.2009 )

ஃ 12 பாடங்கள் விவகாரம் - தீர்வு பிறக்கவில்லை என்றால் பள்ளிகளிலும் அமைதிப் போராட்டம்.

( மக்கள் ஓசை 14.12.2009 )

ஃ எஸ்.பி.எம்.12 பாட விவகாரம் - மாபெரும் கையெழுத்து வேட்டை தொடங்கியது.

( தமிழ் நேசன் 21.12.2009 )

ஃ எஸ்.பி.எம். 12 பாடங்கள் விவகாரம் - தீர்க்கப்பட்டவை - தீர்க்கப்பட வேண்டியவை

( மலேசிய நண்பன் 1.2.2010 )

மாணவர்களை அலைக்கழிக்கும் தலைமையாசிரியர்கள் - பெற்றோர் முறையீடு.

( மக்கள் ஓசை 2.2.2010 )

ஃ எஸ்.பி.எம். 12 பாட விவகாரம் - மழை விட்டும் தூறல் நீடிக்கிறதா?

( ஞாயிறு ஓசை 14.2.2010 )

ஃ டத்தோ டாக்டர் எஸ்.சுப்பிரமணியத்துடன் எஸ் பி. எம். 12 பாட விவகாரம் சந்திப்பு.   ( மக்கள் ஓசை 16.2.2010 )


1.5          மலேசிய இடைநிலைப் பள்ளிகளில், தமிழ் இலக்கியப் பாட வளர்ச்சியில் இயக்கங்களின் பங்களிப்பு.

மலேசியாவில், தமிழ் இலக்கியப் பாடம் பல்வேறு சிக்கல்களையும் சவால்களையும் எதிர்கொண்ட பொழுதும், பல்வேறு சாரார், அமைப்புக்கள், இயக்கங்கள் போன்றவற்றின்பங்களிப்பினால் இலக்கியப் பாடம் உயிர்ப்பெற்று வருகிறது என்றால் அது மிகையாகாது. அவ்வகையில், குறிப்பிட்ட ஒரு சில இயக்கங்களின் பங்களிப்பை இங்குக் காண்போம்.

1.5.1      மலேசியத் தமிழ் எழுத்தாளர் சங்கம்

மலேசியத் திருநாட்டில் தமிழ் இலக்கிய உணர்வைத் தூண்டி வளர்ச்சிக்குத் துணைபுரிந்த இயக்கங்களுள் குறிப்பிட்டுச் சொல்லத்தக்கது மலேசியத் தமிழ் எழுத்தாளர் சங்கமாகும். தமிழ்இலக்கியப் பாட வளர்ச்சியில் எழுத்தாளர் சங்கத்தின் பங்களிப்பை இனிக் காண்போம்.

ஃ மலேசிய இடைநிலைப் பள்ளிகள் பாடத்திட்டதில் சிறுகதைப் படைப்பிலக்கியமும் இடம்பெற்றிருப்பதால், மாணவர்களிடையே இலக்கிய ஆர்வத்தை அதிகரிக்கச் செய்யும் அதேவேளையில், சிறுகதைப் பயிற்சியும் வழங்கும் நோக்கில், இடைநிலைப் பள்ளிகளுடன் இணைந்து சிறுகதைப் பயிற்சிப் பட்டறையை நடத்தி வருகிறது.

ஃ இடைநிலைப் பள்ளிகளில் பணியாற்றும் இலக்கிய ஆசிரியர்களுக்கான இலக்கியப் பயிற்சிப் பட்டறை, 2008, நவம்பர் மாதத்தில் தஞ்சை தமிழ்ப் பல்கலைக்கழகத்தில் ஏற்பாடுசெய்யப்பட்டது. முப்பத்தைந்து இலக்கிய ஆசிரியர்கள் இப்பட்டறையில் கலந்து பயனடைந்தனர்.

ஃ இடைநிலைப் பள்ளிகள் இலக்கிய ஆசிரியர்களுக்காக உயர்நிலை இலக்கியப் பயிலரங்கு இரண்டாவது முறையாக 2009 மார்ச் மாதம் தஞ்சை தமிழ்ப் பல்கலைக்கழகத்தில் நடத்தப்பட்டது. அறுபது ஆசிரியார்கள் கலந்து கொண்டனர்.

ஃ தொடர்ச்சியாக, 2009, நவம்பர் மாதம், மதுரை காமராஜர் பல்கலைக்கழகத்தில் இடைநிலைப் பள்ளி இலக்கிய ஆசிரியர்களுக்கு சிறப்பு பயிலரங்கம் நடைபெற்றது.

ஃ எஸ்.பி.எம். தேர்வில் தமிழ், தமிழ் இலக்கியப் பாடங்களைத் தேர்வு செய்ய முடியாத நிலை ஏற்பட்ட பொழுது, அதனைக் கண்டித்து மேற்கொள்ளப்பட்ட நடவடிக்கைகளில் சங்கமும்தன்னை ஈடுபடுத்திக் கொண்டது.

ஃ இடைநிலைப் பள்ளிகளில் தமிழ், தமிழ் இலக்கியம் போதிக்கும் ஆசிரியர்களுக்கான மொழியியல்- மொழி- இலக்கியப் பயிலரங்கம் மலாயாப் பல்கலைக்கழகத்தில் நடைபெற்றது.

ஃ எஸ்.பி.எம். தமிழ் இலக்கியத் தேர்வில் மலேசிய நாவல்கள் இடம்பெற்ற வேண்டும் என்ற கோரிக்கையை முன் வைத்து பல வருட போராட்டங்களுக்குப் பிறகு தனது முயற்சியில்வெற்றியும் கண்டது.

1.5.2      மலேசியத் தமிழ் இலக்கிய ஆசிரியர் கழகம்.

மலேசியத் தமிழ் இலக்கிய ஆசிரியர் கழகம் அல்லது இலக்கியகம் என்று அழைக்கப்படும் இந்த இலக்கியகம் கடந்த 2009 இல் தோற்றம் கண்டது. இவ்வியக்கம் அரசாங்கப் பதிவுபெற்ற ஓர் இயக்கமாகும். தொன்னூறாம் ஆண்டுத் தொடக்கதில் இலக்கியம் எடுக்கும் மாணவர்களின் எண்ணிக்கை சரியத் தொடங்கிய நிலைமையை மாற்றியமைக்கதோற்றுவிக்கப்பட்டதுதான் இவ்வியக்கம். தமிழ் இலக்கிய வளர்ச்சியில் இலக்கியகத்தின் பங்களிப்பை இனிக் காண்போம்

ஃ 07.03.2009 - 21.03.2009 இல் 65 பேர் அடங்கிய இடைநிலைப் பள்ளிஆசிரியர்கள் தஞ்சை பல்கலைக்கழத்திற்குப் பயணம் மேற்கொண்டனர்.

ஃ இலக்கியகத்தின் முக்கிய நிகழ்வுகளில் ஒன்றான “எஸ்.பி.எம் தமிழ் இலக்கியம் -இலக்கியம் பயிற்றுநர்களுக்கான பயிலரங்கம்” 11&12 ஜுன் 2009 இல் நடத்தப்பட்டது.இலக்கியக்கூறுகளான நாவல், நாடகம் மற்றும் சிறுகதைப் பற்றிய விளக்கங்கள் ஆசிரியர்களுக்கு வழங்கப்பட்டது.

ஃ 21.11.2009 - 08.12.2009 இல் 35 பேர் அடங்கிய இலக்கிய ஆசிரியர்கள் குழு மதுரை காமராசர் பல்கலைக்கழத்திற்குப் பயணம் மேற்கொண்டது.

ஃ 13.2.2010 - 14.2.2010 இல் தமிழ் எழுத்தாளர் சங்கம் மற்றும் மலாயாப் பல்கலைக்கழக மொழிப்புலத்தோடு இணைந்து இலக்கிய ஆசிரியர்களுக்காகப் பன்னாட்டுத் தற்காலத் தமிழ்இலக்கியக் கருத்தரங்கை நடத்தியது.

ஃ 27 & 28 ஜனவரி 2012 இல் எஸ்.பி.எம் தமிழ் மொழி மற்றும் இலக்கியப் பாடம் பற்றிய கருத்தரங்கை, மலாயாப் பல்கலைக்கழக இந்திய ஆய்வியல் துறையின் ஒத்துழைப்புடன்நடத்தியது.

ஃ கல்வியமைச்சு எஸ்.பி.எம்.தேர்வு எழுதும் மாணவர்கள் 10 பாடங்கள் மட்டுமே எடுக்க முடியும் என்று கண்டனம் தெரிவித்த பொழுது,ஆசிரியர் மக்கள் திரளாக ஒன்று சேர்ந்துமலேசிய மனித வள அமைச்சருடன் சந்திப்பு விளக்கக் கூட்டத்திற்கு ஏற்பாடு செய்து, அமைச்சரின் உறுதி மொழியை உறுதிபடுத்தியது இலக்கியகம்.

ஃ 2012 ஆம் ஆண்டு தொடங்கி 2015 ஆண்டு வரைக்கும் புதிதாக அறிமுகம் ஆகியிருக்கும் எஸ்.பி.எம்.தமிழ் இலக்கியப் பாடநூல்களை, மாணவர்களுக்கு இரவல் பாடநூல் திட்டத்தின்வாயிலாக இலவசமாக வழங்குவதற்கான நடவடிக்கையில் இலக்கியகம் ஈடுபட்டது.

ஃ கடந்த சில ஆண்டுகளாக எஸ்.பி.எம் தேர்வுக்குத் தமிழ் இலக்கியம் எடுக்கும் மாணவர்களின் எண்ணிக்கை சரியத் தொடங்கியதைத் தொடர்ந்து, இலக்கியகம் “ மீண்டும் 5000 நோக்கி ”பிரச்சார இயக்கத்தை மேற்கொண்டது.

 

1.5.3  12 பாட மீட்டெடுப்புக் குழு

திரு.ஆ.திருவேங்கடம் தலைமையிலான 12 பாட மீட்டெடுப்புக் குழு, இலக்கியப் பாடம் விவகாரம் தொடர்பான பல போராட்டங்களைத் தொடர்ந்து நடத்தி வெற்றியும் அடைந்ததுஎனலாம் .

1.6          முடிவுரை

மொழியும் இலக்கியமும் நமது இரு கண்கள் என்றால் நம்மில் மறுப்பாரில்லை. பல சிக்கல்களுக்கும் சவால்களுக்கும் மத்தியில் நாம் நமது மொழியையும் இலக்கியத்தையும் காத்துவருகின்றோம். தளராத மனதோடும் தனியாத உணர்வோடும் நமது இலக்கிய வளங்களைக் காத்து வருகிறோம்.தமிழ் இலக்கியம்,மலேசிய கல்வி அமைச்சு நமக்கு வழங்கியுள்ளஉரிமை.இந்த உரிமையை மாணவர்கள் நிலைநாட்ட வேண்டும்.தேர்வு நோக்கத்திற்காக மட்டும் இவ்விலக்கியதைப் பயிலாமல், இலக்கிய இன்பம் நுகரும் நோக்கில் இலக்கியத்தைநோக்கினால் இலக்கியம் மணம் பரப்பும்.

இலக்கியமே பண்பாட்டின் வேர். இலக்கியம் பண்பை வளர்க்கும். பரிவைக் கூட்டும். மரபைக் காக்கும். வாழ்க்கைக்கு வழிகாட்டும். எனவே, இலக்கினை அறிந்து இலக்கியம்காப்போம். இன்ப இலக்கியத்தை இணைந்தே வளர்ப்போம்.

துணை நூல்கள் :

1.            செ.சீனி நைனா முகம்மது, 2007, தமிழ்ச் செம்மொழிச் சிறப்பு மலர், உங்கள் குரல், பினாங்கு, மலேசியா.

2.            மலேசியத் தமிழ் எழுத்தாளர் சங்கம், 2007, மலேசியத் தமிழ் இலக்கியம், மலேசியா.

3.            மலேசியத் தமிழ் எழுத்தாளர் சங்கம், 2009,2010,2011, ஆண்டுக்கூட்டம் மலர், மலேசியா.

4.            ஆ. திருவேங்கடம், 2011, ஒப்பிட்டேன் ஓலமிட்டேன், மலேசியா.

5.            கலைத்திட்ட மேம்பாட்டு மையம், 2003, இடைநிலைப் பள்ளிகளுக்கான இலக்கண இலக்கிய விளக்கவுரை, மலேசிய கல்வி அமைச்சு.

6.            கலைத்திட்ட மேம்பாட்டு மையம், தமிழ் மொழி பாட நூல்,  புகுமுகம், படிவம் 1 படிவம் 2, படிவம் 3, படிவம் 4, படிவம் 5. மலேசிய கல்வி அமைச்சு.


மு. உஷா மனோஹரன் B.A

 

தமிழ் வாழ்த்து

There seems to be an error with the player !

நூலகம்

விளம்பரம்

இங்கு விளம்பரங்கள் செய்ய வேண்டுமா? இன்றே தொடர்பு கொள்க