|
பதிப்புரிமை
அறிமுக விழா
மாதாஜி ஸ்ரீ நிர்மலா தேவி
வலம் வந்தவர் எண்ணிக்கை
|
நிகழ்வுகள் வேர்களை நோக்கி விழுதுகளின் பயணம்
பகுதி 1
மலேசியத் தமிழ் இலக்கியத்தை தமிழகத்திலும், புதுச்சேரியிலும் அறிமுகப் படுத்தும் இலட்சியத்தோடு 34 எழுத்தாளர்கள் 19 நாள் இலக்கியச் சுற்றுலாவை மேற்கொண்டு வரலாறு படைத்தனர். --------------------------------------------------- சிறகடித்துப் பறக்கிறது..... மலேசியத் தமிழ் எழுத்தாளர் சங்கத் தலைவர் திரு. பெ. ராஜேந்திரன் அவர்களின் எண்ணப்பறவை.... கால் ஊன்றிய மலாயா மண்ணில் தமிழை வேரூன்ற வைத்து பிழைக்க வந்த பூமியில் தமிழையும் தழைக்கச் செய்திட்ட மலேசியத் தமிழர்களின் இலக்கியத்தை அந்த இலக்கியத்தினூடே இழைந்தோடும் வாழ்க்கையை.. அதனை வார்த்தெடுத்த இலக்கியவாதிகளை தாய்த் தமிழ்நாட்டில் அறிமுகப்படுத்தி, ஓர் இலக்கிய பண்டமாற்றம் நிகழ்த்திட வேண்டும் என்கிற நீங்காத நெடுநாளைய வேட்கையில் விளைந்தது இந்த இலக்கியச் சுற்றுலா. தமிழ் நாட்டு படைப்புகளை மலேசியர்கள் அறிந்து வைத்திருப்பது போல தமிழக இலக்கியம் மீது மலேசியர்களுக்குள் இருக்கும் தேடலைப்போல.. தமிழக மக்கள் மத்தியில்.. மலேசியப்படைப்பு - படைப்பாளி மீது கவன ஈர்ப்பை உருவாக்குவதை முதன்மை நோக்கமாக கொண்டு தொடங்கியது இந்த வித்தியாசமான பயணம். புலம் பெயர்ந்து வந்து விழுந்த இடத்தில் விளைவித்த இலக்கிய தானியங்களை சுமந்து கொண்டு இந்த விழுதுகள் வேர்களை நோக்கி பயணித்தன. சென்றோம் - கண்டோம் - உண்டோம் மகிழ்ந்தோம் - திரும்பினோம் என்றில்லாமல் எதிர்கால விளைச்சலுக்கு இந்த பயணம் வழி வகுத்து, மலேசியத் தமிழ் இலக்கியப் பரவலாக்கத்துக்கு வித்திட்டது. வரலாற்றுச் சுவடுகளை பாதுகாக்கத் தவறியதால் புலம் பெயர்ந்த பல தேசங்களில் தமிழிலிருந்து அந்தியப்பட்டு தவிக்கின்றான் தமிழன் பெரியதாய் நிகழ்ந்த படையெடுப்புகள் மட்டுமல்ல.. அர்த்தமுள்ள ஆக்கப்பூர்வமான சின்ன சின்ன பயணங்கள் கூட நாளைய தலைமுறைக்கு வரலாறாய் நிலைத்து நின்றிடும். வழிகாட்டியாய் ஒளி வீசும்!
28-11-2007- அன்று மலேசியத் தமிழ் இலக்கிய குடும்பம், சென்னை விமான நிலையத்தில் வந்து சேர்ந்த போது, 'தமிழக அரசு உங்களை வரவேற்கிறது' என்று மலர் மாலை, பூங்கொத்து, பொன்னாடை, இசை முழக்கம் என வரவேற்புகள் திணற வைத்தன, செய்தி மக்கள் தொடர்புத் துறை தலைமை இயக்குநர் முனைவர் .சி. மோகன்தாஸ், கவிப்பேரரசு வைரமுத்துவின் புதல்வன் கபிலன், கவிஞரின் உதவியாளர் பாஸ்கர், பேராயர் ஜேம்ஸ் சந்தோசம் மற்றும் செய்தியாளர், நண்பர்கள் என சென்னை விமான நிலையமே விழாக்கோலம் பூண்டிருந்தது.
இவை அனைத்தும் முத்தமிழ் மூதறிஞர் கலைஞர் அவர்களின் தலைமையிலான தமிழக அரசின் இலக்கிய விருந்தினர்கள் என்ற முத்திரைக்கு கிடைத்த அங்கீகாரம்.
எண்ணப்பறவை சிறகடிக்கும்....
நடந்தவை தமிழ் கமழ்ந்த 30-ஆம் ஆண்டு திருமுறை விழா கடந்த வாரம், கோலாலம்பூர், விவேகானந்தா தமிழ்ப்பள்ளியில் 'மலேசிய இந்து சங்கத்தின் 30-ஆம் ஆண்டு திருமுறை விழாவில், தமிழும் திருமுறையும் இணைந்து மணம் கமழ்ந்த அற்புத விழாவாக மெய்சிலிர்க்க வைத்தது. அன்புநெறியையும் அறநெறியையும் சார்ந்த இறைநெறியைப் போற்றும் திருநெறியத் தமிழ் மொழியை திருஞானசம்பந்தர் ஊர் ஊராக நடைபயின்று 252 தலங்களில் பாடிப்பாடியே வளர்த்தார். அத்தையை திருநெறித்தமிழை வளர்க்க மலேசிய இந்து சங்கம் கடந்த 30 வருடங்களாக தொய்வின்றி அரும்பணி ஆற்றி வருகின்றது என்றும், இத்தகு தெய்வப் பணிகளை சிரமேற்கொண்ட நம் சமயச் சான்றோர்களையும் ஆன்றோர்களையும் இங்வேளையில் நினைவு கூறுவது நம் கடமை என்றும் சங்கத்தின் பொது செயலாளர் டாக்டர் பாலகிருஷ்ணன் கந்தசாமி கூறினார். மலேசிய இந்து சங்கத்தின் தேசிய விழாக்களுள் தலையாயது திருமுறை விழா. கடந்த 30 ஆண்டுகளில் ஏறக்குறைய ஒன்றரை இலட்சத்திற்கும் மேற்பட்ட இந்துக்கள் திருமுறை ஓதக் கற்றுக்கொண்டிருக்கிறார்கள் என்று இந்நிகழ்வில் தலைமை உரையாற்றிய தேசியத் தலைவர் டத்தோ. அ. வைத்திலிங்கம் கூறினார். மலையாளம், தெலுங்கு மொழிகளை தாய்மொழியாகக் கொண்ட இந்து பெருமக்கள் இளம் வயதிலேயே ம.இந்து சங்கத்தின் வழி திருமுறைகளை கற்று, சிறப்பாக ஓதி தமிழ் வளர்க்கின்றனர். இந்த வருட நிறைவுக்குள் குன்றகுடி அடிகளாரின் திருவருகையுடன் திருமுறை மாநாட்டை நடத்த மலேசிய இந்து சங்கம் திட்டமிட்டுள்ளதையும் தலைவர் குறிப்பிட்டார். மலேசியாவைப் பொறுத்தமட்டில், சங்க நடவடிக்கைகளுக்கு, எல்லா சமய அமைப்புகளும், ஆலையங்களும் பொதுமக்களும் துணைநிற்கின்றனர்; இது இந்து பெருமக்களிடையே ஒற்றுமை செழித்துள்ளதை குறிக்கிறது என்றும், திருமுறையை பாடப்பாட, மலேசிய இந்து சங்கம் மேலும் மேலும் வளர்ச்சி பெற்று வருவதை கண்கூடாக காண முடிகிறது என்றும் திருமுருகன் திருவாக்கு திருபீட அதிபர் பாலயோகி சுவாமிகள் தமதுரையில் குறிப்பிட்டார். திருமுறை வளர்ச்சிக்கு துணை நின்ற இறை தொண்டர்கள் எண்மருக்கு, இவ்விழாவில் 'திருமாலையும்' 'திருபரிசும்' அளிக்கப்பட்டது.
இந்த 'நிகழ்வுகள்' பகுதியில் அமைப்புகள், சங்கங்கள், வாசகர் வட்டங்கள், நூல் வெளியீட்டு விழாக்கள் போன்ற இலக்கிய நிகழ்வுகளின் விவரங்களை இலவசமாக பதிவேற்றம் செய்து கொள்ளலாம்.
|
